關員頂更索勻口岸

四十幾隻海關緝毒犬喺訓練學校草地排排坐影相，即係話喺同一時間，冇咗四十幾隻狗仔執勤緝毒啦，海關發言人仲話影響唔大添。咁又係呀，冇緝毒犬啫，或者海關一直有秘密練兵，挑選一班鼻濕濕嘅精英關員頂檔做「緝毒人」，喺幾個口岸用鼻周圍索都唔定。

話時話，緝毒犬影吓相之嘛，唔使小題大作嘅，如果特衰政府諗到冇嘢好諗，認為香港狗隻成日四圍小便，尿頻情況嚴重，可見狗界索K問題嚴重，不排除搞個「狗本驗毒計劃」出嚟，呢班緝毒犬日日索索埋埋咁多，隨時中招斷正o架。你知啦，佢哋同其他紀律部隊同工唔同酬，既冇長狗糧咬，退休之後又冇大集團請，抖番日開心吓都好應該吖。

網友回應......

旺旺

嘩，你睇張全家福幾英，擺晒pose攞晒位，一定影咗成日啦，海關都話影響唔大，睇怕平時緝毒犬都係返幾日放幾日，緝毒一於少理，咪等啲人用鼻索飽佢囉。

阿成

喺口岸見到嘅緝毒犬都好似未瞓醒咁，唔知係咪太悶呢？平時影慣相開party，一做嘢就唔起勁。

金田一

唓！唔畀張相入面全部裝假狗o架咩！

小肥

緝毒犬唔開工一日半日，海關都話對工作冇影響，唔通緝毒犬唔開工，毒販都唔開工？

志雲

紀律部隊成日嗌調整薪酬，作晒反，依家最忠心嘅只係得番警犬、緝毒犬，應該逆市加多啲狗糧畀佢哋啦。

飛虎

海關真係好慘，喺港產片成日畀人描繪到好似二打六咁，一味畀警隊威晒，士氣一定差啦。

貓仔

真係冇嘢搵嘢嚟搞，唔通影張大合照就以為做到嘢咩。

懶人

不如所有紀律部隊合做一個部門，咁啲狗同人一齊用，慳好多人手同狗糧。

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另通知，敬請留意。

網址：www.sunsiupak.blogspot.com