近排好多名人外遊都遇到廁所趣聞，好似立法會議員陳克勤到江西考察，就發現當地小朋友喺臭氣熏天嘅旱廁入面勤奮讀書，而早前富貴黨高層遊西藏又喺布達拉宮發現去得好驚險嘅懸空奇廁，最近馬會前行政總裁黃至剛（圖）去日本玩都有類似嘅趣聞。
黃至剛早前同太太去咗北海道自駕遊，勁歎地道美味海鮮。佢話以前去過好多次日本，每次都帶嚟新驚喜，今次驚喜就係來者不拒嘅公廁。
佢話日本廁所普遍好乾淨，就連自駕遊中途站嘅油站廁所都唔例外，一啲臭味都冇，大讚日本廁所文化值得欣賞。旁邊嘅黃太都話：「係啦！香港啲公廁未埋到去已聞到一陣臭味，搞到唔係好想去，內地嘅公廁就更加惡劣。」其實近年香港公廁嘅衞生已大有進步，但大家仍認為香港公廁又臭又污糟，都幾難搞。