天文台台長李本瀅喺五月尾發表咗一篇應節嘅網誌，提及香港過去幾十年嚟，端午節之前六個夜晚入面，氣溫低過攝氏二十五度、稱得上「舒適晚上」嘅日子買少見少，由上世紀八十年代嘅五成跌到近十年嘅三成。誰知網誌出街後惹嚟網民挑戰，質疑每年端午節嘅日子都唔同，加上今年端午節天氣較涼，有六個「舒適晚上」喎！
隔咗近三個月，李本瀅終於出手，用圖表列出過去六十年端午節喺每年新曆邊日，結論係有規律可尋。然後仲摷番上世紀五十年代嘅數據，證明由五十年代到依家，「舒適晚上」嘅日數大體上係跌勢，加上香港嘅氣溫每十年升零點二度等。
摷咗咁多數據出嚟，佢無非要證明氣候暖化係不爭事實，若果大家再唔做嘢，香港好可能再冇冬天喇！