方舜文上任旅遊事務專員八個幾月，尋日就喺大氣電波講飲講食，例如話高檔日本菜係逢有喜慶要食飯慶祝嘅首選，佢推介銅鑼灣一間星級壽司店，話魚生鮮味到不得了；如果要平民化一啲，佢嘅首選係中環一間老字號麵店嘅雲吞，話一啖食一粒，夠晒滋味，之後佢仲推介灣仔駱克道一間中菜館嘅菠蘿叉燒包添。
講到請客，佢揀中環威靈頓街兩間老字號食肆，仲話食嘢最緊要食物質素，所以平日鍾意食蒸魚同白灼蝦呢啲既簡單又考驗新鮮度嘅食物，而要食蒸魚，佢就話最愛「海旁嗰間」。
全部好似猜啞謎咁噃！但根據佢嘅「貼士」四出查訪，砌出佢嘅美食地圖，包括銅鑼灣壽司廣魚生壽司、中環麥奀記雲吞麵同車氏粵菜軒菠蘿叉燒包等，請客梗係揀老字號嘅鏞記同陸羽茶室啦。
若果只准佢揀一樣下半世日日都食嘅食物，佢毫不猶豫揀皮蛋瘦肉粥，因為係屋企嘅傳統，媽媽逢禮拜日都會煲粥，而佢又特別愛皮蛋喎！