富貴黨二十幾個核心成員近日去咗西藏舉行集思會，喺幾近缺氧嘅情況下大搞腦震盪，思索地區發展，尤其係二○一一年區議會選舉嘅部署，該黨前主席田北俊話黨內總結上次嘅選舉經驗後，決定喺下屆區選作出兩項調整，就係減少火頭、提早部署。
田少透露吸取上屆區選教訓後，下屆會改行精英制，實行貴精不貴多，縮短戰線以集中火力喺有把握嘅中產區出擊。
佢憶述富貴黨喺上屆區選時，啟動選舉工程到「揀蟀」參選後，真正落區做嘢得半年時間，所以選舉最終失利。佢話富貴黨痛定思痛，依家已開始部署，先做遴選工作，令候選人能夠有兩年時間畀選民認識，打好關係。