立法會旅遊界議員阿Paul謝偉俊上禮拜五晚喺川菜館豪擺四圍，慶祝攞番律師牌同慰勞律師行同事過去一年嘅辛勞，咁啱白姐姐上禮拜六生日，佢於是「順便」同白姐姐預早慶祝生日。見咁高興，佢自掏荷包攞五千蚊出嚟抽獎，當中有三封係一千蚊大利是，點知白姐姐人逢喜事，時來運到抽中咗自己。
阿Paul為咗公正，要佢嘔番出嚟再抽過，但白姐姐難得生日中頭獎，又點會肯攞番封利是出嚟吖，仲揸住封利是埋怨話：「阿Paul咁耐都冇送過生日禮物畀我呀！」
諗番停牌嘅日子，阿Paul坦言律師行賺錢冇佢份，損失數以百萬計收入，依家攞番個牌叫做多件架生搵食。咁以後仲敢唔敢影裸照？佢話暫時唔會再用呢種表達手法，如果再影，之前會先Keep Fit，事關身材已經不復當年勇喎！