鬍鬚曾話為咗畀機會幾個實習生歷練，除處理一般嘅文書工作外，佢哋更曾經親身到立法會，觀察拉票同游說等政治過程。但鬍鬚曾可以話係司局長中做箍票同游說工作做得最差嘅，好似上月初立法會表決政府債券計劃嘅決議案，當時大部分黨派都傾向支持，但佢仍急call建制派歸位，搞到身在外地嘅議員要焗住現身，點知議案以大比數通過，激到佢哋生蝦咁跳。

講到游說功力更加不敢恭維，上月尾立法會財經事務委員會想召開特別會議，逼佢就欽點攞命陳做金管局總裁解畫，佢當時暗示建制派拖到十月復會先開，委員會主席「橄欖」陳鑑林見好多委員都唔得閒，咪賣個順水人情畀佢，個會最終開唔成，點知鬍鬚曾竟然完唱，搞到橄欖變擋箭牌，被質疑偏幫政府。

鬍鬚曾本身係反面教材，但佢仲好意思帶埋「徒弟」現場觀摩，學壞師嘅話，咪即係誤人子弟?!