建仔尋日搞咗個三分球射籃比賽，搵咗商務及經濟發展局副局長阿Greg蘇錦樑、民政事務局政治助理徐英偉返娘家打波，仲請埋喺泰國包機事件搞到一鑊泡嘅保安局政助盧奕基。

阿Greg同徐英偉參與「家庭」活動好正常，但非親非故嘅盧奕基都出現就有啲怪相。睇番呢場大龍鳳，建仔連唔識打籃球、身兼立法會主席嘅黨友都拉埋落水，而盧奕基就連波邊都冇掂過！一問之下先知佢平時根本就唔打籃球，今次嚟只係做名譽評判。唔識籃球嘅規則，點做評判呀？原來佢只係負責睇實條罰球線，如果見到有人射罰球時「踩界」就出句聲，呢種「評判」果然識唔識打波都會識做。

既然夾硬畀個位盧奕基攝嘅話，某程度上建仔係想畀個機會幾位高官可以出嚟見吓人，曝吓光。按道理，佢哋應該好好把握呢個機會，好好講吓自己一年做過啲乜嘢先啱吖，就算洗唔甩「零認知」呢個黑豬印，最起碼都叫同公眾有個交代。

街邊搭訕容易收錯風

點知徐英偉話認知率高低唔會影響佢嘅心情，而最近忙住落區推禁毒，話啲後生仔對吸毒嘅後遺症認知好低，仲話其實冇人識仲方便啲，因為佢可以周街同班後生仔傾吓偈喎。

人家明明畀晒位，徐英偉都唔識上，根本係捉到鹿都唔識脫角，最離譜嘅係佢竟然寧願冇人識，偏偏要繼續做鴕鳥，塞個頭落地下。

老實講，做得官點可以冇人識？就算社工落街撈邊青，都要先令佢哋認識自己先傾到偈o架！難為佢仲自喻民政事務局嘅「民意收集機器」，原來其實係「搭訕王」，尤其係佢隨便喺條街度豎起條天線收風，容乜易收錯風o架！