呢嗱，房協舊年推出長者維修自住物業津貼計劃，話資助老人家維修家居喎。個名就好聽嘞，原來係搵笨。九十六歲嘅馬婆婆舊年十月申請津貼，今年三月工程完成後將文件同單據交畀房協，直到上個月不幸過身津貼都未批出。最離譜嘅係，房協一知道婆婆過咗身，七日內就回覆佢家人，話因申請人去世，已取消申請，拒絕批出款項。馬婆婆家人因為墊支工程費，已經陷入困境。

叮！一份申請大半年都唔批，唔通核實申請人資格真係咁艱難？再講，婆婆已經九十幾歲，正一係風燭殘年，房協唔加快速度審批不特止，人一走就唔認數，即刻收遮，仲有冇涼薄啲吖？

本港八十幾萬長者入面，估計仲有唔少人住喺又殘舊、條件又差嘅舊式樓宇，政府如果有心敬老，早就應該幫吓公公婆婆維修家居啦，津貼計劃唔止嚟得遲，批得慢，仲批得少，推出以來得嗰幾千人受惠，安乜嘢老吖，棄老就真！

其實，政府點止棄老，直情欺老、虐老乜都齊啦。老婆婆等到死都攞唔到維修津貼已經夠離譜，原來本港每年仲有幾千名長者同樣係等到死都輪唔到政府資助嘅安老宿位。

有數字顯示，依家輪候政府資助安老宿位嘅長者累積近兩萬五千人，平均要等三年半至有宿位，但政府又係拖得就拖，最快要到二○一一年至增加六百五十個宿位。「老吾老以及人之老」，講咩！

叮！輪候資助宿位嘅老人家絕大多數已經七老八十，無依無靠，身體又差，好話唔好聽，仲等得幾多年吖。政府一味口爽荷包立，年年話會增撥資源，情況年年都冇改善。唔怪得有立法會議員諷刺當局「係咪想等佢死可以起少啲安老院」。

最無良嘅係，政府一邊撳住個荷包，一邊要求長者「居家安老」。講真，如果老人家唔係迫於無奈，邊個咁得閒「麻煩」政府吖，貪佢夠孤寒咩！安老宿位搞極都係僧多粥少，一句講晒，「居家安老」咪即係政府卸膊。

話時話，政府今年最「大手筆」嘅，咪得嗰二百五十蚊醫療券。講開醫療券又係得啖笑，如果牙醫食水唔太深嘅話，勉強都夠剝隻牙嘅，唔怪得冇幾多個長者吼啦。連衞生署自己都爆響口，話截至今年五月底，唔夠一成半合資格長者用過醫療券，派唔派都罷啦！

老人家捱足一世，到風燭殘年時冇咩奢求，只係想生活得有尊嚴啲，偏偏撞着個樣樣諗縮數嘅政府同佢哋鬥長命，真係欲哭無淚。叮！