百年一遇大抽獎

運輸署今年發出四百六十個教車師傅新牌，竟然吸引咗三萬三千宗申請。真係唔講唔知，原來做教車師傅只係需要有三年牌以上，五年內冇撞死人同埋冇試過醉酒駕駛就得，認真兒戲。所以小白老弟都好後悔，點解錯過咗呢個百年一遇嘅大好機會，冇去參加呢個幸運大抽獎。

其實唔只小弟咁諗，嗰日搭小巴聽到個亡命小巴司機都呻晒笨，佢一手揸住軚盤，一手拎住個手提電話同行家講：「×！我手車出名安全，唔信？咁多年嚟，我日日踩盡過百公里飛車都未試過撞死人，之前撈運輸，晚晚喺上面劈完咪又係咁揸落嚟，點會炒車咁流㗎？搵我做教車，真係馬路零意外，香港人人愛！×！唔同你講住，前面有架白車好寸，截停佢炳完再講，拜拜！」

網友回應...X）...

[　車臣　]

睇怕以後過馬路都要小心啲，馬路邊豈是虎口咁小兒科！

[　小不點　]

周街都係計時炸彈，都係拜定神燒埋香至出街咯。

[　Calvin　]

原來做教車咁易，唔怪得依家啲司機連白車都Cut線啦！

[　車神　]

聽講做考牌官頂薪近三萬蚊，仲可操生殺大權，幾爽呀。

[　Lavina　]

釀成西貢特大車禍嘅司機，好似係判監三年兼停牌三年，佢出冊後又係一條好漢，隨時做埋教車師傅傳授危駕秘技。

[　懶人　]

希望可以快啲發明到隨意門，咁大家齊齊唔使行路，話之佢點批教車牌都唔使驚。

[　紅毛單　]

點解依家冇「K後駕駛」法例呢？唔係講笑，遲啲可能有師傅索住K教車。

[　姚　]

唔係啩，三年牌唔代表乜喎，佢可能三年都未揸過車呢。