新世界挑戰立法會調查梁展文事件嘅司法覆核案件聽日就開審，各方都已搵咗大狀應戰，政府早前留難立法會，要佢哋用儲備打官司，搞到立法會處處慳住使，好彩最終都以「友情價」請到一位英國殿堂級御用大狀應戰。不過，呢單官司政府都要落水，律政司仲搵咗盛傳係全港最貴嘅資深大律師唐明治專程由英國飛嚟香港打官司。咁樣孤寒人哋闊佬自己，政府擺明係想借唐明治嘅功力，喺官司中立於不敗之地。
依家全港收得最貴嘅民事案大狀，應該就係回歸前做過律政司嘅唐明治，事關佢功力深厚外，家吓仲喺英國住，搵佢打官司就要包埋機票酒店等食宿開支。
講開唐明治，佢年紀雖然有番咁上下，但近年見佢出庭打案時仍然轉數好快，仲成日同佢太太、前行政立法兩局首席議員鄧蓮如周圍蒲。不過，口痕友認為政府今次只係以「涉及團體」嘅身份列席官司，唔係正式嘅與訟雙方，估計只會講番涉及政府利益嘅觀點，唔會特別為立法會幫拖，有冇需要用公帑請咁貴嘅大狀，真係見仁見智。