個人資料私隱專員吳斌繼日前質疑驗毒計劃或涉私隱問題，尋日又喺電台節目「發功」，話如果教育局唔提供實質資料，就算同佢開會都只係不着邊際嘅空談，搞到教育局副局長陳維安要好似小學生咁，下禮拜捧份報告畀佢過目。
吳斌開腔後，教育局已表明會喺呢個禮拜同佢開會，點知吳斌尋日反客為主：「未約實（開會時間），因為政府未答我封信，亦都冇畀資料我……初稿都未敲定，我點知合唔合法？」跟住仲繼續數落政府：「我唔覺得一定要諮詢我，但我坐喺度，係納稅人畀嘅錢……如果我龜縮唔出聲，係咪我失職呢？」
陳維安食檸檬後，坦言局內已整緊份資料畀吳斌，仲有骨咁話：「等專員睇完（資料）先傾開會時間啦！」至於吳斌批評教育局未有驗毒計劃嘅執行詳情，陳維安亦滿懷戰意咁反駁：「當局會跟足個人資料（私隱）條例同專員嘅關注去做。」睇嚟佢哋有排招來招往。