政府經濟顧問陳李藹倫日前擔大旗發表政府第二季經濟報告，尋日朝早又上電台節目解畫。有聽眾話，日前公布嘅經濟數據同政府財金高官鬍鬚曾、任志剛之前嘅說法差好遠，唔滿意政府評估經濟一再失準，質疑財金官員嘅功力。陳太回應時故作淡定話，香港啱啱經歷十級金融地震，當時到處沙塵滾滾，官員評估情況時視野並唔係好清晰，依家有曙光梗係睇得清啦。
陳太呢番解釋聽落好似有啲道理，但諗真啲就覺得嘥氣同激氣，事關今次金融海嘯，唔係淨係香港捱苦，只係本港嘅經濟評估好失準啫。而且，港府官員呢邊恐嚇市民，嗰邊就㩒住荷包，只肯小恩小惠咁紓困，家吓竟然賴睇唔準市係因為沙塵滾滾，真係聽者有火啦。
尋日嘅節目上，陳太都大講經濟，咁表現又點呢﹖心水清嘅人話，佢分析經濟前景時，一再話最壞嘅時刻過咗去，但經濟唔會V形反彈，甚至唔好借錢買股票等，都好似執長和系主席超人嘅口水尾，睇嚟陳太都要多啲訓練至得喇。