梁太尋日出席恒生銀行首次同再生會合辦嘅十大再生勇士選舉活動，被問到近期股市表現時，梁太有問必答，但對近期股市唔多睇好，佢話預期股市波動會非常大，投資者必須小心。至於個人投資，佢就話自己一向作長線投資，會根據企業嘅業績嚟買股票，然後長期持有，所以唔太注重價錢。

咁恒生一姐有冇買恒生股票呢？佢微微一笑話，自己只有好短嘅時間買股票，譬如公布消息之後，否則可能有利益衝突。

逆境中抱怨無補於事

喺活動上，梁太話聽到啲再生勇士嘅個人經歷好感動，話人一定要懂得處理逆境，因為每個人都會有唔開心嘅時候，冇人可以一世都順境，如果遇到逆境就只係識埋怨，對邊個都冇好處。佢多年嚟都係銀行界高層，仲做埋香港少數嘅女大班，一生應冇乜大起大跌啫！梁太話，喺呢次金融海嘯中，見到自己嘅朋友、客戶喺風暴中突然乜都冇晒，就算唔係親身感受，都會感染到嗰種負面情緒，所以佢做人嘅態度係積極面對，即使有少少低潮都要勇往直前。

佢仲話，有時間不如諗吓點防止唔好嘅事發生好過，唔怪得之佢尋日出口術呼籲股民小心啦，或者佢都係想防止唔好嘅事情發生，投資者有難，銀行都好難獨善其身。