版主感想

世界難撈頂硬上

政府成日話要搞乜港物港，講咗咁多年，只係整咗個「大隻港」出嚟。不過窮則變、變則通，依家有行叫二十四小時電單車外賣車手，喺逆市中一枝獨秀。聽聞呢行人工唔係高，而且屬於外判工種，你知啦，叫得「外判」，肯定唔慌有好嘢，據講有外判商每月會扣起千幾蚊人工，有啲入職幾個月，連張合約都未見過。奇怪嘅係，依然有好多人爭崩頭去做。

當然啦，世界難撈係事實，但小白老弟朋友嘅朋友，識得有個二世祖類型嘅物體，平時日日揸架名車返工做外賣車手，佢話套制服好型，頭盔又夠爆，加埋架電單車，Wow，貼埋錢都願做咁話。不過後生仔唔好以為好潮呀，做呢行係搵命博，搵食就冇得好講，潮到有乜冬瓜豆腐冇得賠，咁就要諗真啲喇。

網友回應

發仔

睇見佢哋真係慘，畀間外判公司咁樣剝削權利，變相「假自僱」，最基本保障都冇。

匿名

呢啲咁嘅「假自僱」手段，我估都唔止一間公司係咁啦，無論大大小小公司都有咁做，勞工處應該查緊啲啦。

kathy

世界難撈，打工仔為求自保，搵工都係睇清楚至好簽約，勞工處應畀多啲指引。

志文

電單車外賣真係高危工作，有咩意外都埋身入肉㗎。

may

人哋都係打份工搵食啫，要同你搵命博，點樣計都唔啱數啦。

健太

做死人咩，又冇保障，將嗰筆超豪廣告費轉畀員工福利保障仲實際啦，打工仔精神爽利，做嘢效率都高啲。

Peter

外判工最易畀公司走法律漏洞，政府應該嚴謹調查，研究立法修正啦。

Winnie

佢哋真係要爭取番應有嘅權利，唔係盞畀大公司欺壓！

版主：小白(@^@)"

銜頭：評論員

特徵：

路見不平，

Blogger相助