憲報尋日公布新一屆嘅航空發展諮詢委員會成員，由下月一號起生效，任期兩年。喺新一屆嘅名單入面，鄭慕智以外嘅十四名成員全數獲委任，仲新增香港總商會主席包立賢、應用科技院前主席黃子欣，同埋香港空運貨站有限公司常務董事黃思豪三名成員。
其實政府喺七月初宣布由鄭慕智接替彭鍵基法官出任離職公務員就業申請諮詢委員會主席時，鄭慕智就被質疑違反政府嘅「六六原則」，但佢話已辭去航諮會同策發會兩項公職，今次只係正式宣布。
新委員當中，以黃子欣最為矚目，佢係香港首間廉價航空甘泉航空嘅董事之一。聽聞佢因為同前甘泉主席李卓民分屬教友而入股，仲同朋友合共投資逾一億，雖然甘泉航空喺上年四月清盤收場，但佢依然獲委任入航諮會，算唔算係安慰獎呢？