香港迪士尼樂園尋日送樹畀寶蓮寺，樂園行政總裁金民豪冒雨喺寶蓮寺搞咗個植樹儀式，住持釋智慧本來拍心口話出席主禮，但活動開始一刻，釋智慧唔見人，改由首座和尚宏通法師「頂更」。
然而釋智慧喺活動結束後又突然露面，當時宏通正招呼緊金總食齋宴，釋智慧即時細細聲同金總講：「呢位係我哋嘅未來方丈。」言下之意，下屆寶蓮寺揸Fit人係邊位，大家心中有數啦。
佢事後解釋失場原因，話因為大病後講嘢唔及以前好，所以冇主禮。但佢頭腦依然清醒，問係咪交棒畀宏通，佢好嚴肅咁話：「呢個要由董事局決定，唔係我話事，但宏通同健釗肯定係最後兩大人選。」
幾時交棒？佢語帶玄機咁話：「寶蓮寺有我喺處同冇我喺處都係一樣啫，年尾我會同你哋講嘢㗎喇！」莫非意味佢將喺年尾宣布退位？