佢同貿易發展局總裁林天福仲順道逛一逛精品展。精品展嘅展品包羅萬有，由床上用品到鐘錶都有，臨別秋波嘅黎以德上演一幕心繫業界，用八達通嘟咗四十幾蚊撐業界，喺自動售賣機買咗把可以遮風擋雨嘅縮骨遮，仲試埋好使好用嘅手提電鑽。行過一個以港式風景做主題嘅模型攤位時，佢仲問負責人啲模型咁有香港特色，國際市場受唔受落㗎？算係調職前嘅傾力演出。

舊年佢先升正首長級第六級，傳聞話佢嘅新上司、運輸及房屋局常任秘書長何宣威明年退休，令佢有機會上位做常秘，於是問佢呢個傳聞真唔真，佢強調話：「今日仲係工貿署署長。」跟住再追問，佢就掂行掂過走人嘞！

老實講，喺官場打滾咁多年，佢當然深明樹大招風嘅道理，咁快表態咪等於擺啲炸彈喺自己身邊？咁梗係避得就避，費事炸死啦！