商務及經濟發展局副局長蘇錦樑（Greg）嘅二仔志永上月喺英國利物浦大學醫科畢業，阿Greg特登請兩個禮拜大假，同太太、大女飛去英國參加囝囝嘅畢業禮，然後飛到意大利羅馬上船享受地中海郵輪假期共敍天倫，之後志永會喺英國做兩年實習醫生。
志永十一歲已立定志願做醫生，做爸爸嘅眼見囝囝大學畢業，仲做到自己鍾意嘅職業，話感到開心同欣慰喎！
雖然阿Greg話今次輕鬆放長假，但仍然掛住份工，仲借今次郵輪假期為正籌備興建嘅香港郵輪碼頭偷師，研究碼頭周邊嘅配套設施，例如可以喺旅客落船地點表演香港傳統藝術同設立傳統手工藝店舖。佢話郵輪旅客消費力好強，一落船就瘋狂購物，就連平時外遊唔購物嘅佢，都喺土耳其買咗幅手織羊毛地氈返屋企。