家陣除咗天主教教區、辦學團體同學校議會外，最初炮轟政府冇諮詢佢哋嘅驗毒主角學生哥近日仲群起而攻之，前日先有三個學生同青年團體跳出嚟開記招，跟住有人又喺網上平台facebook開群組，發起「先簽名，後罷課」，依家已有幾百人響應，隨時搞到一鑊泡。

呢班學生哥反驗毒愈演愈烈，隨時搞到校園驗毒計劃反艇，教育局於是派政治助理Jeremy楊哲安負責遲嚟嘅救火任務。局內問責官員當中，竟然搵個最低級嘅出嚟，啲學生會唔會嫌佢細粒(o架)？Jeremy就自嘲話就係可能見佢最後生，同學生有偈傾，先派佢去喎。

Young啲係咪真係work(o架)？Jeremy自爆已用facebook聯絡咗搞罷課group嘅WY Law同學，話想約佢出嚟傾，對方仲好爽快咁應承咗。佢又約緊其他三組表達過反對意見嘅團體出嚟見面，但暫時未有確定時間。依家facebook群組有咁多人響應，個個都同佢傾嘅話，睇怕佢要黐實個電腦同張櫈先得嘞！

陳維安「獻身」被潑冷水

副局長陳維安前幾日喺大氣電波話願意「獻身」畀個驗毒計劃，等學生釋除疑慮，點知即刻畀學生聽眾潑冷水，Jeremy又有乜板斧先？

佢話已經同班學生摸咗一次底，發現佢哋當中有非常合理嘅憂慮，但亦有一啲誤會需要澄清，例如「假陽性結果」嘅擔憂其實可以喺技術上解決，又話自己同班學生見面，一定會好好聆聽學生嘅意見。佢仲語重心長咁講，年輕人成日認為大人唔明佢哋，咁大人就應該跳入佢哋嘅生活諗法去了解。唔知學生哥聽到佢咁講，收唔收貨呢？