尋日有多名應屆會考生去考評局喺灣仔嘅辦事處投訴，指今屆會考評分混亂不堪，懷疑改錯卷，要求局方免費覆核成績。有同學仔喺Facebook網站發起反考評局群組，過萬人加入聲援，要求還考生一個公道。

秀才作反以往只係喺電視、電影至睇得到，家陣居然喺香港街頭上演。同學仔咁大反應，係因為考評局混帳，令人對呢個手握考生前途及命運嘅官僚機構完全冇晒信心。

呢嗱，有位叫家欣（化名）嘅女同學，成績一向名列前茅，今年四月參加會考中文聆聽科考試唔記得帶收音機，畀監考員誤導，以為照考都冇問題。點知成績出嚟至發現中招，被扣分不特止，仲因為差一分無緣原校升讀中六，未來兩年焗住要畀六萬幾蚊去讀私校。

最離譜嘅係，考評局初頭承認監考員誤導，仲道埋歉，點知臨放榜就反轉豬肚死口唔認錯，話家欣「無權以受監考員誤導為由而提出抗辯理據」。神係佢鬼又係佢，乜都畀考評局玩晒啦！

叮！家欣嘅遭遇不過係冰山一角咋，考評局啲烏龍嘢又點止呢單。有考生根據一貫表現同臨場發揮，預計英文科可以攞到三至四級，結果只得個「不予評級」嘅U；有同學校內成績中上，結果六科全部「肥佬」；有同學連試都冇考，平時亦冇交功課，居然無啦啦有「分數」。

會考成績出錯可能影響一生，考評局烏龍百出，而且愈錯愈離譜，絕對應該負起責任搞番掂，如果考生要求索卷核查，更應該提供方便，盡量配合。申訴專員公署亦曾要求局方增加透明度，為考生提供答卷。

可惜，考評局見錢眼開，考生要覆核成績唔係唔得，但要相金先惠。雖然話覆核後如果成績獲得提升，考生可獲退還款項，但結果要到八月底至知，到時學校乜位都派晒啦，咪又係搵同學笨！

考生覆核成績困難重重，考評局設置人為障礙為難學生，都唔知為咗乜。其實，考評局近年頻頻出錯，醜聞不斷，例如唔見試卷、出錯題目、誤評分數、粗言穢語當「潮」語等等，公信力早就所餘無幾喇。

叮！考評局平時做嘢好似夢遊咁，唔出錯至奇。好似舊年高考英文聽力試嚴重出錯嘅三份試題咁，經過兩次覆核同九次校對，居然冇人發現錯誤，畀申訴專員批評「得過且過，不思進取，有錯不認，態度不可取」。考評局死性不改，衰完一鑊又一鑊，唔通撞咗邪？