追數算式鬼斧神工

有個女人因為八百蚊，慘被大耳窿逼到走上絕路，吸血貴利王個名，真係名不虛傳。不過，做大耳窿呢行一啲都唔易㗎，至少要識番幾個中文字，追數淋漆嗰時，唔會將「還錢」寫錯為「環淺」，隨時搞到債仔監生笑死。而且大耳窿呢行冇乜前途，睇勻百幾項「毅進」課程，冇一個叫「大耳窿」課程，又冇「貴利財務學」副學士同學士銜接，想自我增值都唔得呀。

前排之嘛，警方瓦解咗一個大耳窿集團，發現有個二十八歲嘅女文員，向大耳窿借八千蚊，連本帶利要還十一萬，唔好以為簡單呀，請問係點計出嚟吖？如果有人寫得出呢條算式，已經拎咗個數學諾貝爾「費爾茲獎」去普林斯頓大學做教授啦，使鬼屈喺呢度收數咩！

網友回應

小b

真係人間悲劇呀，真係諗極都唔明，點解警察唔做嘢，任得啲吸血貴利王害人，佢哋仲話想加人工添，不知所謂！

lomo

有冇搞錯呀，錢都未借就要嘔凸，呢啲唔係大耳窿咁簡單，簡直係人渣！

Fanny

警察唔係要除暴安良咩？佢哋去晒邊呀？

路人甲

一日都係呢個無能政府，執法者只係識得造反，縱容呢班吸血鬼周圍害人，成日話好難搵證據，廢到冇朋友，懶就真，依家白白害咗一條命，好嬲呀！

Cyril

有名你叫吸血貴利王啦，聽講好多債仔都係紀律部隊人員，連執法者都走唔甩，一般小市民仲唔畀佢吸乾吸盡咩！

匿名

紀律部隊一個二個搞兵變，香港無王管，梗係小市民受苦啦！\

任總

大耳窿數口仲精過財金官員，不如請佢哋做金管局啦！

SS

警察都唔知做乜，成日話舉證困難，喂，塞匙窿、淋紅油呢啲已經砌得入啦！

版主：小白(@^@)"

銜頭：評論員

特徵：

路見不平，

Blogger相助