本文重點
年底先換屆嘅廠商會近日已爆出前哨戰，該會前立法會議員呂明華有意競逐會長一職，日前喺公開場合揭可能係對手嘅黃友嘉私隱，暗指佢年前曾入院「維修」，身體麻麻哋。此言一出，搞到身在海外嘅黃友嘉專登喺凌晨致電返港，澄清自己身體狀況良好，參選會長絕無問題，仲反擊呂明華爆佢私隱「好冇必要」！
「入醫院有乜咁奇」
黃友嘉正喺美國公幹，平時沉默寡言嘅佢喺長途電話中先以「私人嘢」為由，唔想講太多健康，最後都承認曾入院，但就唔講因乜事入院：「我有同廠商會會董提過自己入院，但冇諗過呢啲私人嘢竟然會畀人攞出嚟講。」
對於呂明華公開佢患病私隱，黃友嘉不以為然咁話：「我今年五十幾歲，入醫院有乜咁奇！呢啲事毋須大驚小怪，更加冇必要因為選舉公開人哋嘅私隱。」仲暗寸呂明華話：「選舉應該係講功績，幫個會有更大貢獻仲好啦！」