政壇新老交替，下一屆立法會將出現翻天覆地嘅變化，多個功能界別議員都會換將，中總嘅立法會議員「IQ博士」黃宜弘屆時亦會卸任，最近有傳該會準備揀蟀，問到會長蔡冠深時，佢好玄咁話：「年輕有年輕嘅好，年長嘅有經驗都唔差吖。」
佢嘅意思係，會內有識之士藏龍臥虎，年輕嘅、年長嘅都係唔錯嘅選擇。依目前走勢嚟睇，慈善家方潤華嘅仔方文雄、全國政協委員黃英豪同港區全國人大廖長江三人，都係有潛質接棒嘅人，中總副會長楊釗都話「佢哋係好人選之一」。IQ博士早前都列出條件，話接班人必須符合三大準則：愛國愛港，事業上軌道，而且要有直選準備。