本文重點
港府擴大政治委任後，八個副局長高薪厚祿加入政府已經一年，佢哋喺直屬局嘅表現真係彈多讚少，連煲呔曾希望八人分攤地區收風嘅角色都做唔好。事緣八人被指令每人負責兩區，如環境局潘潔負責西貢、屯門，教育局陳維安負責葵青、大埔咁，可惜一年過去，地區人士都話副局落區冇料到。
譚志源要執爛攤子
地區消息透露，副局落區，雷聲大、雨點小，推行之初，都識約區議員飲茶傾偈打哈哈，但係日子一耐，就人人失憶，唔記得計劃嘅目的係探民情、聽民意。深水埗區議會副主席譚國橋話，負責該區嘅食物及衞生局副局長梁卓偉只係落區討論豬流感問題，並冇關注其他議題。屯門區議員陳雲生亦話，環境局副局長潘潔曾到屯門區議會諮詢喺屯門區設立焚化爐嘅意見，但完全唔知道佢係負責屯門區。
副局政助制度本身係特區畸形政治生態下嘅怪胎，呢個制度嘅搞手「攞命陳」陳德霖已經離開特首辦，新主任譚志源接手都咪話唔棘手。