香港年底就會主辦東亞運動會，體育界已為呢個運動會磨拳擦掌，籌委會主席霍震霆尋日透露，萬眾矚目嘅開幕式將喺水上舉行，屬全球首次。為咗令呢次盛會好好睇睇，佢哋搵咗曾擔任京奧開幕式副總導演兼著名大導演張藝謀嘅副手陳維亞擔大旗，又邀請曾參與京奧開幕嘅表演者來港「幫拖」。咁講，會唔會照搬北京奧運會嘅精髓呢﹖不過，香港首次搞咁大型嘅運動會，竟然連導演、表演者都要靠輸入，香港係冇人才定係冇有心嘅人才呢？呢鋪真係醜死人！
東亞運動會嘅開幕式十二月五號晚喺維港上演，製作費料達三千萬元，最巴閉係設置一個堪稱史上最大嘅水中舞台，霍公子尋日出席一個活動時話，開幕式唔衰得，所以不論燈光設計同音響效果都搵內地專家幫手。咁節目中有冇一啲富香港特色嘅民間藝術表演呢﹖佢就唔肯答。
依家全副精力投入搞運動會嘅霍公子又話，開幕式當日佢主要喺台下招呼VIP嘉賓，已答應出席嘅要人包括中東元首、現任國際奧委會主席羅格，甚至內地亦有領導人將來港，但暫時未知邊個係代表。旅發局主席田北俊早前話東亞門券遲遲未到手，霍公子否認印飛印得慢：「你叫佢（田少）努力啲啦！」仲強調東亞運開幕當日臨近聖誕節，如果田少加多兩錢肉緊推廣，應會吸引好多遊客喎。