指容若愚發晦氣

大埔區校本驗毒計劃遭各界批評後，港府急急補鑊，尋日開始安排六個官員車輪轉喺港台一個時事節目中亮相。據講，呢啲官員包括司局長同副局長，佢哋將分範疇解釋政府抗毒政策同校本驗毒方案。光哥尋日打頭陣，佢喺節目拋咗一堆有關冚毒嘅數據，仲話驗毒計劃係要預防「未沾毒品的青少年吸第一口」。

錄影節目啱啱喺午間時分播出冇耐，光哥已經喺中環露面，我哋講到天主教香港教區傳播處主任容若愚日前以個人身份建議各界齊齊參與驗毒計劃一事，光哥對呢個說法都好有保留，認為呢個建議流於做騷，相信提議者只係一時發晦氣。不過，佢都勇於接受挑戰，話如果有人覺得佢哋高官高高在上，他亦願意帶頭驗毒。

身為保安一哥，光哥梗係唔怕接受挑戰啦，只係高官驗毒，對推動校本驗毒有乜作用呢？教育局副局長陳維安日前都曾經話過願意接受驗毒，仲暗寸容若愚個建議浪費資源添，可見官員對呢個擺明挑戰嘅建議已有共識。

點都好，校本驗毒計劃未落實已引嚟太多質疑，政府已部署咗宣傳戰，嚟緊幾日陳維安、勞工及福利局局長張建宗等都會接棒出席同一電視節目推銷，希望佢哋呢次車輪戰可以撲火啦。