你知啦，依家經濟不景，好多打工仔冇嘢做，見到有呢陣及時雨，唔少人喺迫於無奈嘅情況下都要試試。問題係，原來刊登呢啲廣告嘅都唔係善男信女，一聯絡上佢哋，結局一定有咁悲慘得咁悲慘。

呢嗱，早前就有個時裝店女東主透過信貸中介人公司，諗住借一萬元周轉一下，點知佢畀低咗七百多元手續費之後，財務公司即刻原形畢露，唔借錢不特止，仲要反咬一口，要再收八百元服務費至肯罷休。

最慘嘅係，呢位女士唔係行到絕路都唔會向財務公司借錢啦，仲邊度有錢畀班吸血鬼吖。吸血鬼始終係吸血鬼，連八百元都唔放過，使出電話滋擾、恐嚇傷害家人、搞舖頭以及搵上門呢個「追數四招」。好不幸，婦人最後抵受唔住壓力，卒之喺屋企燒炭自殺，仲留低遺書要求警方將吸血大耳窿繩之以法。

真係聞者心酸，聽者流淚。不過呢宗個案只係冰山一角。呢嗱，前排警方瓦解一個涉嫌以超出法例規定九倍、五百四十厘年息放數嘅大耳窿集團。其中有個二十八歲女文員嘅個案夠晒經典，佢○七年向大耳窿借咗八千元，結果連本帶利竟然要還十一萬元，真係令人O晒嘴。

據警方估計，不法集團運作咗三年，除咗一般小市民之外，仲向包括警隊、消防及懲教署人員在內約一百五十名債仔放數，涉及嘅貸款額高達八百萬元！叮佢個鎯鎯，何止係大耳窿，簡直係大咕窿啦。

除此之外，社會上仲有各種求職陷阱，好多初出茅廬嘅後生仔一個唔小心，隨時踩到正。試過有一名十九歲中五畢業女生，因為求職心切，喺朋友嘅游說下，居然一日內向三間財務公司借貸十一萬元，最後搞到要申請破產。

類似嘅個案，真係無日無之，不過指望警方將呢班不法分子繩之以法，咁就難咯。警方只係關心人工有冇出少咗，返工時間有冇長咗，對於維護法紀、保護市民呢個天職，早已拋諸腦後。

叮佢個鎯鎯，警方對掃蕩高利貸、求職陷阱束手無策，一句「舉證困難」，任得呢班吸血鬼橫行肆虐，等於向不法分子示弱，咁仲成世界！既然掃黃可以放蛇，因乜事捉大耳窿唔可以主動放蛇搜集證據？

仲有呀，大耳窿集團收數手法層出不窮，拍裸照、淋紅油、灌水、放蟲、塞匙窿，乜嘢毒招都出齊，擺到明係刑事罪行，唔使放蛇已經證據確鑿啦！

呢啲害人陷阱長期存在，已經係不爭事實，當局如果繼續坐以待斃，放任不管，話唔埋遲啲有過半數紀律部隊都跌晒落去，唔好又出嚟一哭二鬧三上吊，要用小市民嘅血汗錢代還呀！叮！