六個紀律部隊群起作反，唔使講，主要訴求當然係為錢，但佢哋似乎有個好嚴重嘅心結，就係好唔妥同樣係紀律部隊嘅警隊，竟然可以搞特權，兇一兇，特衰政府當堂腳仔軟。

冇計啦，有煲呔曾一句「警察世家」，一句頂九句，成班警務人員好似着咗黃馬褂咁，當堂升晒呢。呢件嘢好過避彈衣多多聲，何止刀槍不入呀，連迫擊炮都打佢唔入。

話時話，呢班二奶仔唔恨得咁多啦，人哋警隊曾經喺港英年代有過非常光輝嘅作反戰績，單係一場警廉衝突，已經夠名留青史啦，嗰啲乜嘢《ID精英》、《烈火雄心》、《隨時候命》算係老幾呀？警隊大把貨，仲可以拍番套《PTU之警察世家》、《PTU之親疏有別》，甚至係《PTU之家有喜事》，吹咩？

PTU之警察世家

網友回應......

雙得生

趁「警察世家」仲話緊事，我都係投考警察啦，呢三年包保可以前程錦繡！但三年之後呢，就真係唔知會唔會三年之後又三年啦，自己睇定下屆特首乜背景啦！

你咪理

用人唯親唔係今時今日嘅事，特首將身邊嘅差佬親人都數晒出嚟，其他紀律部隊唔係諗住有份爭呀？

一哥

致消防員、救護員、入境主任：適可而止，因住畀警察喺機舖捽頸。

Galie

戲都有得做啦，PTU至上得大堂，有冇見過烈火雄心跑出吖？唔通煲呔曾踩埋電影界？

Sam

講錢失感情，都係慳番啖氣啦！你睇，平時就話人人平等，一講錢就分到大細啦，消防員、救護員咪搵自己來搞囉，牌面輸硬。

第3日

公僕以錢行先，要脅市民，算罷啦！大家學定自衞、急救、攀石，買定滅火筒、急救用品……

強仔

呢個世界梗係靠關係啦，其他部隊上街叫到喉沙都冇用。

輝

見到佢哋真係把幾火，待遇已經係人上人啦，成日郁啲話冇士氣，實在太過貪得無厭啦！

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另通知，敬請留意。

網址：www.sunsiupak.blogspot.com