依家好多智庫冒起，唔少仲係作為參政嘅踏腳石。好似近年嚟積極推動年輕化嘅廠商會，趁住今年踏入七十五周年，大鑼大鼓搞活動省招牌，會長尹德勝尋日開記者會宣布九月起有連串搞作，仲爆料話籌組緊一個智庫，取名「才略工場」。
智庫初步由尹會長任總監，再搵會內四至五人擔任召集人，分別就工商、財經、創意文化、社會經濟同教育等範疇進行研究，有好橋就獻畀政府，廠商會又將拉攏學者、社會名人做顧問。咁疑似特首候選人梁振英係咪招攬對象之一呢？佢話：「我唔想有利益衝突喎。」
老實講，立法會逐步邁向普選，睇怕廠商會係想趁早培訓多啲商界才俊去搶位嘞！尹會長亦直認不諱，話：「我鼓勵商人從政同直選路線，依家做好啲基建，等將來叫人出來參選都唔使太突然。」咁佢係咪有意參政？佢賣關子話：「真係唔知喎，咁長遠嘅嘢！」
廠商會想喺政壇多啲介入，當然要同各路人馬打通脈絡，尹會長遲啲仲會約見城中大孖沙傾偈添！