立法會議員甘乃威原定喺上個星期一晚登機飛去捷克布拉格，點知就撞啱熱帶氣旋「天鵝」襲港同埋飛機壞電腦，最後要喺星期二朝早轉乘另一班機再喺芬蘭轉機，一來一回唔見咗大半日假期，甘乃威話惟有加緊行程補番數。
途中佢又試過喺當地深夜兩點鐘接獲本地傳媒嘅越洋電話訪問，喺凌晨四點鐘同香港嘅辦事處同事商討公務，又要晚晚將即日影落嘅靚相同所見所聞放上佢嘅網誌，搞到冇覺好瞓，但佢自爆喺歐遊期間狂食雪糕，返港後第一件事就係要修身減肥。
不過，佢喺網誌度寫得最着緊嘅，竟然係有幾多雷曼苦主表態接受回購方案，證明佢真係一名工作狂，放假搞到咁辛苦都係自己攞嚟嘅！
