香港武術代表團早前喺第一屆曼谷亞洲武術運動會囊括四個獎牌，隨團嘅港協暨奧委會會長霍震霆都話感到好光榮。霍公子係代表亞洲奧林匹克理事會出席運動會開幕同閉幕禮，期間有幸同泰國皇室人員及總理阿披實近距離接觸。
運動會有乜趣事？霍公子話開幕當日同總理阿披實喺運動場外等候皇室人員到場時，眼見一條紅色長地氈由路邊直通會場，行慣紅地氈嘅霍公子起初以為同阿披實一齊尾隨皇室人員行紅地氈進場，後來發現阿披實只喺紅地氈以外行走，佢亦醒水行埋一邊，事後才獲悉紅地氈係皇室人員御用嘅。原來佢差啲行錯紅地氈。
政府申辦東亞運動會搞到寒寒酸酸，要打鑼籌款做宣傳，霍公子暗諷政府唔識寶。佢話好多國家都爭辦國際性大型運動會，不僅東南亞國家，連中東國家都想分一杯羹，事關可帶來可觀收益。