詹培忠奉勸政府咪指望友好議員收口做橡皮圖章，事關議員天職就係監督行政機關，政府施政出現問題，如果隻眼開隻眼閉，分分鐘會流失選票，萬一四年後畀泛民搶盡直選議席，主導議會，到時政府真係有得震冇得瞓嘞。

工聯會黃國健直言香港冇執政黨，政治架構先天注定議員個個係反對黨，尤其政府醞釀政策出台，政黨冇份參與，建制派議員冇權利參與制訂政策，自然無義務為政府擋箭、護航，所以當政策出台，議員啃得落就啃，啃唔落惟有直斥其非，咁至夠公平嘛！

建制派議員一講起特區政府，齊聲狠批，槍口一致，點會係一盤散沙！事件反映煲呔曾嘅強政勵治建立喺流沙之上就真。