私隱專員吳斌畀教育局局長孫明揚封信，其實係質疑喺計劃中，只要家長同意，學童就要被人拉去驗尿，但現行法例係要求家長同當事人都同意先得。前日傳媒收到呢封信已經係夜晚八點幾嘅事，搞到政府倒瀉籮蟹，要漏夜出聲明回應，解釋個計劃完全合法，份聲明出街嘅時候，都已經係尋日凌晨一點鐘，真係蚊都瞓啦！

出信玩殘政府職責所在

有啲奇怪嘅係，吳斌早一個禮拜約咗傳媒尋日食飯，見面前夕就整封信去玩殘政府，到咗尋日飯局就即刻變傳媒焦點，真係咁啱得咁蹺？

吳斌仲喺飯局搵機會推莊，佢話自己平時都畀人笑係無牙老虎，仲點會有能力玩到政府呢？加上佢係職責所在，要保障市民私隱，既然見到個計劃中有一啲佢關注、又屬於佢範疇嘅事宜，所以咪出信畀政府囉！

至於封信點解咁夜先出，佢話自己寫嘢有時用中文、有時用英文，今次封信就用咗英文嚟寫，至於大家睇到嘅中文版就由同事幫手翻譯。佢仲不忘補充，話用咗好多心機嚟寫嗰封英文信㗎，費事令人誤解，所以英文原文比較接近佢意思。咁個中文版呢，就連佢自己都睇到頭暈，仲話如果大家睇得明的話，佢都要向大家學習。佢咁講係咪喺到暗踩自己嘅同事譯得唔好？

既然係公署發嘅譯本，佢作為公署嘅最高負責人，有責任確保所有公署發出嘅文件或者新聞稿都要準確無誤，但佢竟然見到有問題都唔改咗先出街。若果中文版本有乜令人誤解嘅話，咁佢係咪可以唔上身呢？若果真係出咗乜嘢差池，市民一定話佢好似隻棋子咁A字膊推卸責任，將個波推畀啲同事啫！