大家有目共睹：得o靚模得天下！如今o靚模寫真集大賣，稍有知名度的都要加印又加印，搞到新學年推出的新高中課程，有六成多的書本未及印好，有套經濟書最離奇，要二○一一年才出版！所以話，利之所在，你估同啲錢有仇咩！得o靚模得天下，理鬼你道德佬一味嗌「意識不良」，民主阿婆狂呼「教壞細路」，可是，o靚模話自己Sell陽光與海灘！青春作伴搵真銀，懶理你真恤髮假遊行！

講真，讀得毅進，最緊要實用，要是學非所用，學而無用，讀完未必搵到工，就等於螺絲對不上螺母，有鬼用咩！做o靚模就唔同，即使唔出寫真集唔寫錯字連篇的小說，還可以由書展殺入動漫節，又可以縱橫維園工展，馳騁美食博覽（唔一定要食雪糕，食港產手唧魚蛋、手打牛丸都得啫）。筆者若出書，必禮聘o靚模寫序，厚酬其造勢，說不定西九若真有「香港文學館」，筆者會獲邀去剪綵！

o靚模已成社會顯學。北大教授李零給傳統文化潑冷水：孔子不是軟實力，老子不是軟實力，傳統文化不能救中國。o靚模救不了中國，卻可以救香港，她們正應了一個電腦廣告：很小很強大！校園驗毒計劃找o靚模宣傳必定成功！