呢段宣傳片用更生人士嘅主觀鏡頭，由出獄嗰刻開始，有個懲教人員一邊打開門，一邊語重心長咁話：「出去要重新做人啊！」跟住看更好友善咁打開大門；鄰居見門就閂，立即笑笑口撳番開；返到屋企，所有親人都表現得好歡迎。最後一幕去到工場，上司更加拍一拍佢膊頭，以示支持同埋鼓勵。

呢位更生人士好感動咁話：「犯咗事，係應該受到懲罰。喺懲教院所裏面，經過反思同學習，出到嚟又有咁多人關心、支持同埋鼓勵，我決心改過，珍惜大家畀我嘅機會。」

唔係講笑，真係睇到太一叮眼濕濕。不過宣傳片歸宣傳片，當科幻片睇咗就算，大家千祈唔好當真。因為喺現實生活中，口口聲聲話要「支持更生，共建安穩社群」嘅特區政府，居然係帶頭歧視刁難嗰個，呢條更生路認真難行。

話說有一個小市民陳先生今年五月去衞生署一間外判公司應徵做臨時搬運工人，面試時，有職員問佢有冇犯過事，佢好老實咁直認不諱，話幾年前曾經因為打交而留有案底，法官當時判佢罰款五百蚊，但唔使坐監。隔咗冇幾耐，陳先生接到通知請咗佢。

咁嘅時勢有份工做，梗係開心到爆，但陳先生做咗三個星期左右，外判商叫佢去衞生署總部嘅聘任組報到同遞交身份證明，仲要去警察總部打指模，陳先生以為只係例行公事。點知上個月中，外判商突然同佢講，因為衞生署唔批准，所以要同佢解約咁話。

叮佢個鎯鎯，大部分政府部門都冇要求外判商招聘嘅臨時搬運工人呢啲工種，要申報刑事紀錄，唯獨衞生署例外。唔單止要申報，竟然仲會炒魷魚添，有冇搞錯呀！

佢只不過係做搬運之嘛，又唔係搶衞生署署長林秉恩個位，使唔使咁矯枉過正呀？立法會議員梁耀忠批評，輕微刑事紀錄三年後會被剔除，良民證都申請到啦，衞生署擺到明帶頭歧視更生人士。

事實上，政府話就話支持更生人士，但只係空口講白話，實際上從無積極協助過佢哋重建新生。

呢嗱，懲教署九八年一月推出咗釋囚更生計劃，超過九成喺獲釋後一個月內搵到工。從數字上睇嚟，呢個計劃都幾成功吓，但有專責輔助釋囚嘅前線義工踢爆，冇錯，大部分釋囚好快搵到工，但原來當中好多未必做得長，有唔少人做咗個幾兩個月就被人炒，所謂更生計劃只不過係一場騷。

正所謂「人非聖賢，孰能無過；知錯能改，善莫大焉」，係咪好應該畀個機會更生人士投入社會呢？計太一叮話齋，一個「錯而能改」嘅更生人士，可能比「錯而不改」嘅林秉恩更適合做高官。