離新學年開學剩番幾個禮拜，大件事咯，市面鬧緊教科書荒，新高中課本更加係重災區，學生哥隨時冇書上堂。聽講罪魁禍首竟然係o靚模，因為佢哋嘅寫真集實在太好賣，加印又加印，搞到教科書印刷檔期都要讓路。小白老弟認為，只要殿堂Cup o靚模露暈娜出嚟話佢本書係教科書唔係寫真集，所有問題就會迎刃而解。

老實講，將寫真集當作教科書，好處多多，至少，你幾時見過教科書作者出嚟送吻兼送親筆簽名Poster吖？而且o靚模寫真出版商好有良心，賣得好，頂多出多個慶功版，唔會年年改版搵家長笨。最實際嘅係，有人計過數，要買齊新高中課本，閒閒哋要三、四千蚊至得，但o靚模寫真本本印刷精美，易睇易明，都不過幾十蚊，買齊只需千幾蚊，簡直超值！

冇教科書入o靚模數

網友回應...X）...

[A Tung]

在香港印兩萬幾本寫真就可以攪亂印刷廠，我識一位老師嘅教科書，每年賣五萬本，賺版稅近一百萬，只要佢印少幾萬本就ok，我同佢講講。

[天鵝]

連細路仔都情願儲錢買寫真都唔買教科書，咁梗係加印o靚模寫真好過啦！

[大雄]

呢啲教科書出版商好離譜，年年改版，加價加到飛起不特止，仲要冇貨添，真係把幾火！

[芝芝]

教科書真係貴到飛起，諗起都嬲，不如罷買啦，抗議！抗議！餓死書商！

[十樓]

簡直係打破咗太陽底下無新事嘅講法，你幾何聽過香港會因為印書而印到冇得印㗎？瞬間買書風氣鼎盛，邊個話港人唔愛書？只係圖像化而已！

[正亞]

用寫真當書咁上堂囉，教人體結構學！提早同學生升呢！

[心震]

唔係啩？！呢啲咪道德淪亡囉！啲書商見錢開眼，本身已經食水深，家下連學生開學冇書用都唔理！有冇良知(口架)？

[傑仔]

香港人本色，大市場為本，教科書都要行埋一邊。

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另通知，敬請留意。

網址：www.sunsiupak.blogspot.com