今個暑假簡直係畀口靚模攻陷，先係書展，繼而係動漫展，遲啲仲話殺入電腦展添！之不過，立法會資訊科技界議員「IT豪」譚偉豪好少理，趁住暑假向囝囝進行一次國情同道德教育。
IT豪為咗生意同公務，成日北京香港兩邊走，但佢十四歲嘅囝囝Arthur就從來未去過北京，所以上月尾佢同太太就帶咗Arthur上北京玩足五日，包括帶佢踏足萬里長城做好漢、遊覽北京頤和園同水立方等名勝，仲坐埋象徵國家現代化發展嘅京津高架鐵路，明顯係國情遊學團。
隨身帶《道德經》講解
佢仲隨身帶住本《道德經》，趁坐車坐船冇嘢做嘅空檔就攞出嚟向囝囝講解做人道理。究竟Arthur聽唔聽得入耳呢？
IT豪話囝囝平日都好聽教聽話同關心社會時事，唔係因為佢有問題先搞呢個惡補課程喎！