早前喺一片爭議聲中，香港迪士尼終於獲得立法會通過擴建計劃，迪士尼行政總裁金民豪稍為喘定後，近日就四出活動，仲準備喺禮拜五推出「樹木保育計劃」，首個得益者就係有大嶼山地主公之稱嘅寶蓮寺。
迪士尼打算送三十棵樹畀寶蓮寺，金總仲請埋寶蓮寺住持釋智慧出席植樹儀式添！其實，寶蓮寺綠蔭處處，唔志在迪士尼送樹啦！睇怕呢次都係外交手段居多。
記得當年釋智慧一度極力反對興建「三碌拎」，聲言誓死唔肯踏足纜車站半步，搞到政府頭都痕埋，好彩「三碌拎」前董事總經理張少華夠醒目，上任後隨即去拜地主公，最後仲請到釋智慧畀面坐纜車添，變相幫「三碌拎」打咗支強心針。
俗語話「橋唔怕舊，最緊要受」，睇嚟金總係見到張少帥呢招使得，再加上禮多人不怪，佢就有樣學樣同寶蓮寺搞好睦鄰關係，尤其迪士尼擴建工程動工在即，可能送樹行動係想釋出善意，當日後擴建動工期間有乜
郁，引起啲不便時，博釋智慧放佢一馬又或者鬧少啲都唔定。