校本驗毒試行計劃處處碰壁，繼天主教香港教區主教湯漢早前表明，唔提倡天主教學校參加校本驗毒試行計劃，翌日副主教楊鳴章又出嚟解畫，改口風話教區畀學校自行決定參唔參加，尋日事情又有新進展。
有報道引述天主教香港教區傳播處主任容若愚以個人身份建議，校董、校監、校長、教師、校工，甚至家長同舊生等齊齊參與驗毒，同時邀請官員、名人同藝人參與，實行與學生同行，但強調費用由政府負責。似乎又有「新花臣」玩喎！但教育局副局長陳維安尋日喺大氣電波就話願意接受驗毒，但強調會自願承擔費用，唔通想暗寸容若愚要政府負責所有驗毒費用嘅建議，係浪費社會資源？