自○七年兩鐵合併後，坊間出現「大學站」鬧雙胞嘅爭論，因為除咗原來中文大學旁邊嘅「大學站」外，西港島線連接港大嘅車站依家亦暫時叫做「大學站」，兩間大學嘅學生早前更為此掀起罵戰。
西港島線尋日舉行動工典禮，港大校長徐立之應邀出席，佢仲首次開腔回應雙胞案，笑言：「我哋梗係想自己有咩啦……」仲好婉轉咁叫大家「攞番啲歷史出嚟睇」，又話：「港大大學堂（港大對出嘅巴士站名稱）個名用咗好耐，返去睇吓啲古董巴士都係去大學堂……耐過中大，嗰度以前叫『馬料水』。」
徐校長呢番話除咗巧妙反駁外界對港大遲嚟爭先嘅批評外，仲為新車站「正名」提供理據，但中大人接唔接受佢嘅講法就要問過佢哋至知嘞。