立法會區議會嘅代表尋日向全體區議員發出請柬，話為咗加強區議員同行政會議成員嘅聯繫溝通，喺下月十一號邀請咗行政會議召集人CY梁振英出席午餐會，就地方行政發展作專題演講，每人收費三百大元。其實過去亦有行會成員唔定期咁同啲區議員食飯會面，但大多只會見區議會正副主席，從冇聽過好似今次咁大陣仗。
須知唔少區議員都身兼唔同界別嘅特首選委會成員，如果政府真係決定「翻叮」○五年嘅區議會政改方案並得到通過，全港五百多名區議員都有份投票揀特首，成為下屆特首選舉嘅最大單一票倉。究竟今次午餐會係純粹演講，定係有人借啲意搞場大龍鳳畀CY搶閘拉票，真係只有當事人先知。
有區議員就質疑，CY雖然喺香港政壇打滾咗好耐，但從冇聽過佢搞過地區行政，而且係人都知個活動係由CY做主角，佢哋做配角嘅反而要畀三百蚊食飯，真係搵鬼去咩！