尋日茶敍一開始，周縣長就為經常更改行程同埋遲到早退表示抱歉，點知下一句就出事，最終傾咗二十五分鐘就話趕飛機閃人，比原定時間少咗差唔多成半。

事緣佢自爆話本身「同前任特首、現任特首，以及未來要參選嘅特首約好咗見面」，此言一出，成班記者立即追問佢口中未來要參選嘅特首到底係邊個？初初周錫瑋並冇察覺講錯嘢，仲話「你哋唔係都知嘅咩？」跟住記者話唔知喎，佢先心知不妙，之後佢都唔肯再回應，睇嚟佢知呢次爆響口爆出禍嘞！

依家疑似嘅特首參選人有政務司司長唐唐、財爺鬍鬚曾同行政會議召集人CY梁振英，究竟邊個係周縣長心目中未來要參選嘅特首？唐唐嗰邊嘅人回話冇約過周縣長喎，咁就剩低另外兩個。睇番周縣長原定嘅六日訪港行程，CY就出席咗上禮拜舉行嘅台北縣招商推介會，CY當日臨走前都仲同周縣長通過長途電話，問候吓台北縣嘅風勢添！睇嚟CY係周縣長口中嘅疑似人選喎！

暗寸港府唔埋堆會落後

為咗唔想再提未來特首呢個敏感話題，周縣長喺茶敍中不停強調兩岸三地需要取長補短、相互合作，仲暗寸話既然大家需要合作，港府唔一齊合作唔緊要，皆因佢哋已經同南京市政府傾過，遲啲又會同上海市政府傾，如果香港唔想合作嘅話，到第時佢哋傾好晒，「香港就會落後」。

周縣長又話呢次見唔到港府高官並唔失望，因為第日可以喺台灣再見。邊個疑似未來特首參選人會去同佢見面，大家就要拭目以待嘞！