才女寫愛情小說頁頁有錯字，不過因為佢受歡迎，所以本書係咁意都賣一萬幾千本，如今仲話有人攞嚟炒，有價有市，認真威過威士忌！朋友喟然嘆曰：咁先至係作家引人入勝嘅地方！咁嘅小說家，醒過首位獲得諾貝爾文學獎的華裔作家高行健。高行健未成名前，代表作好少人會買，得獎後銷量自然好些，不過，好似我買咗、仍然塵封在書架上的大有人在。所以，我支持香港建「文學館」，第一批要珍藏嘅就係才女寫嘅暢銷錯體愛情小說！
筆者欣然舉腳贊成，並認為o靚模都應該出書搞活個市。除了豐富香港「文學館」外，更使人知道做作家梗好搵過皇帝，一洗文人自五四以來的酸餿氣。此外，這亦是一盤生意，譬如生產「o靚模作家文房系列」之類，用了o靚模纖體筆，考試不再「肥佬」；用了o靚模擦膠，人生無污點，讓每個人擦出亮麗人生！
先前，筆者覺得寫小說十分神聖，像魯迅要吶喊，叫國人不要只是「一見短袖子，立刻想到白臂膊，立刻想到全裸體，立刻想到生殖器，立刻想到性交，立刻想到雜交，立刻想到私生子」。如果o靚模都寫小說，有了作家的身份，那麼就不會見到了o靚模，便想起了攬枕！
村上春樹說他寫小說只有一個原因，就是給予每個靈魂尊嚴，讓它們得以沐浴在陽光下。故事的目的在於提醒世人、檢視體制，避免它馴化我們的靈魂、剝奪靈魂的意義。o靚模小說家不用太複雜，她們只叫電車男努力學習，天天向上！