呢嗱，呢排紀律部隊爭薪行動愈演愈烈，紀律部隊人員總工會下月二日舉行座談會，主要訴求包括五大紀律部隊實施直通職級、劃一薪酬以及下調工時。早前有紀律部隊工會警告，唔排除發動上街遊行、罷工、按章工作等工業行動，叮！容乜易遲啲會出現消防員「有水放水，冇水散水」(口架)！

根據「東方報業民意調查」顯示，有四成七受訪者認為，陸續有紀律部隊發起爭取薪酬行動嘅原因，係警隊爭取薪酬行動激發其他紀律部隊有樣學樣；兩成三就話係政府遲遲未落實職系架構檢討，薪酬繼續出現唔公平；一成八話薪酬唔公平嘅情況長期存在，今次終於爆發。

你話小市民唔嬲就假，家陣個市咁差，打工仔保住份工已經偷笑啦，成班公務員身在福中不知福，仲話想加人工添，有冇再離譜啲呀？佢哋嘅訴求睇嚟五花八門乜都有，其實歸根究柢原因只有一個，就係想爭取薪酬與警隊看齊之嘛。

問到對於政府過去處理紀律部隊薪酬爭議嘅表現有乜評價時，有四成三受訪者直斥政府顯得手忙腳亂，見步行步；兩成一唔滿意當局偏幫個別紀律部隊，先至會造成分化；兩成批評政府無認真處理問題。

有人事顧問講出咗問題嘅癥結，政府委任嘅副局長以及政治助理人工偏高，早已令公務員好唔服氣，想爭取更高薪酬。最弊係政府一直迴避檢討紀律部隊薪酬架構嘅爭議，一味採取拖字訣，先至搞到紀律部隊積怨愈來愈深。

事實上，受訪者非常擔心政府未能處理好呢次紀律部隊爭薪問題，會帶來負面影響。三成六受訪者憂慮其他文職公務員有樣學樣；兩成七擔心會爆發激烈行動，影響社會穩定；兩成三擔心會影響市民生活及安危。

叮佢個鎯鎯，港府有幾無能係人都知，但寧畀人知莫畀人見。依家畀人睇穿咗係幾咁軟弱，你夠大聲，政府就驚，其他紀律部隊當然唔執輸，梗係食住上啦。

造成咁嘅局面，有三成四受訪者認為政府無能，未能控制局面；兩成七狠批弱勢政府，冇做好管治；兩成六指摘公務員事務局管理不善。至於邊個要負上最大責任呢？三成七受訪者認為紀律部隊要負上最大責任；兩成九話係曾蔭權；另外有兩成四認為係公務員事務局。

叮佢個鎯鎯，公務員事務局局長俞宗怡快啲拆掂呢個炸彈，唔好再向呢班紀律部隊屈服，否則再咁樣落去，其他公務員又話要同警察同工同酬，到時庫房再多錢，睇怕都唔夠養呢班大帝呀！