其實要做紀律部隊，使乜花錢學吖，因為咁嘅時勢，識查案、救人、滅火有鬼用咩，最緊要係識得扭計，如果對講數同罷工有深入研究，各大紀律隊部爭住請啦！

所以小弟懷疑好多人報毅進，未必為就業咁簡單，一個課程你估平(口架)，閒閒哋要三萬，可能為咗炫耀家底都未定喎！你揸波子好威咩，佢伯爺有閒錢畀個心肝寶貝報齊一百七十項毅進課程，今日跳吓Hip-Hop，聽日唱幾句《鳳閣恩仇未了情》，嗱，呢啲咪叫做Quality of Life囉！

因乜事讀毅進

網友回應

sunny

試吓無妨吖，香港日日都請咁多紀律部隊，遲啲通街都係毅進出品，係時候開拍定套《毅進無間道》，實勁收啦。

肥仔斌

咁書都唔使讀啦，入毅進、鐵飯碗、保就業、人工高、零黑鑊，聽落前途無限。

Gloria

毅進課程學費近三萬，認受性又唔高，讀完得個吉，情願勤力啲，重讀好過啦。

minime

好心生生性性去搵份工做啦，依家大學生都去做PC仔，世界難撈呀。

Chris

天生我才必有用，毅進可以開多啲好似縫紉咁嘅興趣班，等學生可以自己整攬枕，唔使畀幾舊水人哋賺。

阿茂

讀完大學都未必有工做，不如實實際際搵門手藝學吓，都仲可能有出頭天。

高妹

嘩，遲啲警署口供紙咪多數火星文？毅進有冇教先？例如：鵝hm忍罪@_@

小黑

啲公務員郁吓都有成萬人去考，讀完毅進對考政府工有幾大幫助？

一個全新的報上部落格，每日與你暢談社會至Hit話題，剖析問題所在。

讀者如對本欄每日話題有任何意見，歡迎登入網址發表意見。本報保留採用刊登權利，不另通知，敬請留意。

網址：www.sunsiupak.blogspot.com