舊年金融海嘯爆發後，富貴黨前主席田北俊坦言炒燶Accumulator（累計認購期權），指身邊嘅有錢朋友「個個都有買」；海嘯過後，佢對經濟狀況態度審慎，又親眼目睹歐美各地都窮到燶，認為有排都未復甦，但盲目嘅散戶唔理會理性嘅分析，個市轉眼間又升番二、三千點，偏偏佢又錯失今次復仇嘅機會，自嘲走雞。
不過佢一啲都唔着緊噃，事關佢單靠位於九龍灣、樓高四十層嘅自置商廈已執番唔少。佢話銀行信貸利息咁低，就算租金平咗，兼成幢大廈出租率只有大約七成，但一來一回每月都淨賺唔少，所以話使乜憂啫？
普羅市民如果有閒錢，係咪買樓投資有着數呀？田少話山頂豪宅同天水圍有好大分別，係買都要小心啲。