另一個係現年四十六歲、身兼中總會董、全國政協委員嘅黃英豪，佢出身法律世家，優勢係涉足政壇多年，人脈深厚，加上佢舊年宣布注資兩億元入股瀕臨倒閉嘅海域化工，易名香港資源，短時間內邀得「四叔」李兆基同華懋支持，準備收購金至尊一役，令佢喺商界人氣急升。

至於行政會議前成員廖長城細佬廖長江亦被視為黑馬人選。有指廖長江係穩陣派，○八年底失驚無神參選港區全國人大，仲一擊即中，應該係中總刻意培植嘅對象。

IQ博士話中總的確揀緊蟀，但唔想咁快指名道姓。佢分析，二○二○年立法會隨時行普選，三年後嘅立法會中總代表要有心理準備，熱身十年，到時披甲上直選戰場，為中總穩守呢個議席。睇番三位熱門人選，要佢哋放低身段玩直選，睇嚟唔容易喎！