曾接受心、肺、肝、腎同骨髓移植嘅四十三個港人，月底將出戰喺澳洲黃金海岸舉行嘅世界移植人士運動會，一班健兒尋日舉行誓師大會，請嚟全國人大常委范徐麗泰同行會成員「金刀梁」梁智鴻做嘉賓（圖）。
范太將左腎捐畀愛女已係十四年前嘅事，金刀梁致辭時不忘讚范太係器官捐贈嘅佼佼者，夠勇喎。查實金刀梁都唔弱，佢自爆四十年前全港首宗器官移植手術就係由佢操刀，當年嘅病人係做腎臟移植，佢至今仍記憶猶新。
醫管局行政總裁蘇利民就畀大會主持「抽後腳」，話說兩年前香港首次派出健兒，喺曼谷嘅世界移植運動會奪得佳績，蘇總裁曾拍心口承諾兩年後帶隊去澳洲參賽，因為當地係佢家鄉。可惜佢最終帶隊不成，深感內疚之餘，不忘補飛狂讚比賽場地風景優美，叫參賽健兒咪掛住欣賞美景，連比賽都唔記得參加喎。