議會文化急劇改變，立法會秘書長Pauline吳文華上任短短一年，已經歷咗議員掟蕉掃枱、新大樓內部設計定稿、首次有議員喺立法會大樓內跌傷、公眾席發生首宗血案，同埋梁展文事件專責委員會畀人司法覆核等多項歷史性事件，簡直做到冇停手，少咗時間拍拖湊孫。
議員喺議事廳掟蕉掃枱，Pauline要經常企喺最前線負責阻截議員衝向官員席，佢本人話未驚過，因為嗰幾位成日搞搞震嘅議員其實都好有男士風度，絕對唔會對一名弱質女流動粗，有時仲會事先向佢通水，講定下次搞啲乜，等佢預早準備添！
唯一影響到佢嘅，係為免衝出去維持議會秩序時發生意外，佢開立法會大會要戒着太高嘅鞋。梗係啦，容乜易仆親呀！睇怕佢唔止着唔到高踭鞋，就算着平底鞋都要加多兩個轆，事關可以跣得快啲，去阻止啲發難嘅議員嘛！
除咗冇得着高踭鞋有啲不滿外，佢仲有少少唔開心，就係每逢開夜車趕文件都幾乎要通宵，食零食多咗，令佢肥咗唔少。